२८ भदौ २०७६, काठमाडौं
साविक माओवादी केन्द्रको मुख्यालय, पेरिसडाँडा (कोटेश्वर) मा आयोजित एक समारोहमा नेकपाको भगिनी संगठन राष्ट्रिय युवा संघ नेपालको संगठनात्मक कार्यालय उद्घाटन गरिएको छ । लगत्तै संगठनका इञ्चार्ज महेश बस्नेतले संयोजक रामप्रसाद सापकोटा ‘दीपशिखा’ र सहसंयोजक रमेश पौडेललाई सपथग्रहण गराई नेतृत्वको जिम्मेवारी समेत दिएका छन् ।
पदभार ग्रहणसँगै साविक एमाले र माओवादी केन्द्रको एकतापछि पार्टीका मुख्य एक भगिनी संगठन–वाईसीएल र युवा संघको एकता प्रक्रिया पूरा भएको छ ।
७७ जिल्लामध्ये ४२ जिल्लामा साविक युवा संघ नेपालले र ३५ जिल्लामा साविक वाइसिएल नेपालले संगठनात्मक नेतृत्वको जिम्मेवारी लिनेछन् भने सचिवालयमा साविक वासिएल नेपालबाट ५२ र साविक युवा संघ नेपालबाट ५७ रहने छन् ।
संगठनको केन्द्रीय समितिमा एकतिहाई बराबर १११ सदस्यीय सचिवालय बनाइनेसमेत जानकारी गराईएको छ ।
