०८ भदौ २०७६, काठमाडौं
अत्याधिक मदिरा सेवन गरी बिमानभित्रै अभद्र ब्यवहार गरेको आरोपमा गैर आवासीय नेपाली संघ (एनआरएनए)का अध्यक्ष भवन भट्टलाई त्रिभुवन अन्तर्राष्ट्रिय विमानस्थलबाट फर्काइएको छ ।
शनिवार राति १० बजे सिल्क एयरको फ्लाइट नम्बर एसएलके ४१३ ९कल साइन एमआई ४१३० बोइङ विमानबाट भट्ट सिंगापुर जान लागेका थिए । विमानस्थलको सम्पूर्ण काम सकि उनी विमानमा बसिपनि सकेका थिए । विमानबाट झारेर उनलाई फिर्ता पठाइएको बिमानस्थल स्रोतले बताएको छ ।
भट्ट र उनीसँगै रहेका एक पत्रकार मदिरामा लठ्ठ थिए । मदिरामा लठ्ठिएका दुवै जनाले अभद्र व्यवहार गरेपछि एयरलाइन्सले विमानबाट झारेको हो । उनीहरु चढेपछि विमान नै उडाउन पाइलटहरुले नमानेपछि जवरजस्ती विमानबाट बाहिर पठाइएको स्रोतले बताएको छ । प्रधानमन्त्री केपी शर्मा ओलीलाई भेट्न सिंगापुर जान लागेको उनीहरुले बताएका थिए ।
तर भट्टसँगै रहेका पत्रकार सनत न्यौपानेले सिल्क एयरलाइन्सले आफुहरुलाई अभद्र ब्यवहार गरेको बताएका छन् । ‘हामीलाई सिल्क एयरलाइन्सले अभद्र व्यवहार गरी विमानमा बसिरहेको अवस्थामा बाहिर निकालियो’ उनले भने ।
