मन मिलेपछि उमेरले छेकेन : ६१ वर्षको उमेरमा आफु भन्दा १६ बर्ष कान्छी महिलासँग गरे विवाह

१३ साउन २०७६, काठमाडौँ

मन मिलेपछि धनदौलत, उमेरले रोक्दैन भन्ने उदाहरण दिदै ६१ वर्षीय एक व्यक्तिले आफू भन्दा झण्डै १६ वर्ष कम उमेरकी महिलासँग लगनगाँठो कसेका छन् । गुल्मीको मुसिकोट नगरपालिका–९ , अर्लाङ्गकोट पुर्खेयौली घर भई हाल पश्चिम नवलपरासीको गैँडाकोट नगरपालिका–४ झपर्दी वसाईसराई गएका ६१ वर्षीय नारायणप्रसाद सापकोटाले ४५ वर्षीया लक्ष्मी अर्यालसँग लगनगाँठो कसेका हुन् ।

आइतवार यो जोडीले हिन्दु परम्परा अनुसार विधिवत विवाह गरेका हुन् ।  बेहुलाका कान्छा भाई जयराम सापकोटाका अनुसार बेहुलाका एक छोरी, दुई छोरा र नातिनातिना पनि छन् । हजुरवुवाको विवाहमा नातिनातिनाहरु रमाएर सहभागी भएका थिए ।

एक बर्षअघि उनकी श्रीमती खिमकलीको ५८ बर्षको उमेरमा मृत्यु भएकाले  बुढेसकालमा सहाराका लागि  उनले अर्को विवाह गर्नुपरेको हो ।

छोराले बुहारी भित्र्याएकोमा खुशीले गद्गद् भएकी ८६ वर्षिय आमा हरिकला सापकोटाले विधि अनुरुप नै बुहारी भित्राएको बताइन् ।