२० असार २०७६, काठमाडौं
नेकपा केन्द्रिय सदस्य तथा प्रधान मन्त्री केपी शर्मा ओलीका परराष्ट्र मामिला सल्लाहकार डा. राजन भट्टराईले आफ्नो पहलमा पारेको काठमाडौं महानगरपालिका वडा नं. ७ स्थित मैजुबहाल सडक विस्तार आयोजनाले अपेक्षित गति नलिएपछि स्थलगत रुपमै सरोकारवालासँग छलफल गरेका छन् ।
काठमाडौं महानगरपालिका वडा नं. ७ मैजुबहाल रिङ्गरोड व्यवस्थित नहुँदा स्थानीय जनप्रतिनिधिको अनुरोधमा डा. भट्टराइले ४ करोड ३३ लाख बजेट विनियोजन गराई २०७६ बैशाख मसान्तदेखि आयोजनाको काम थाली पुस मसान्त सम्ममा सम्पन्न गर्नुपर्नेमा सुरुवाती काममा नै ढिलासुस्ती भएपछि कामपा वडा नं. ७ वडा कार्यालयको आयोजनामा आयोजित कार्यक्रममा निर्माण व्यवसायी, स्थानीय सरोकारवाला र जनप्रतिनिधिको संयुक्त अन्तरक्रिया आयोजना गरिएको छ ।
कार्यक्रममा डा. भट्टराईले आफू हुर्किएको र खेलेको मैजुबहाल लगायत वडा नं. ७ को विकास निर्माणमा आफ्नो भावनात्मक सम्बन्ध रहेको बताउँदै स्थानीयको माग बमोजिम समयमै निर्माण सम्पन्न गर्न सम्बन्धित ठेकेदारहरुलाई निर्देशन दिएका थिए । स्थानीय जनप्रतिनिधिलाई आवश्यक भूमिका निर्वाह गर्न अनुरोध गरेका थिए ।
वडा नं. ७ का वडाध्यक्ष शुद्ध डंगोलले आफ्नो वडाको विकासको लागि डा. भट्टराईको पहलप्रति धन्यवाद दिदैं सडक निर्माणको गति अगाडि बढाउन आफूले सक्दो पहल गर्ने प्रतिबद्धता
जनाए ।
कार्यक्रममा राष्ट्रपति विद्यादेवी भण्डारीका सह स्वकीय सचिव शिव भट्टराई, वडा सदस्यहरु कृष्णमणि भट्टराई, निर्मला पुडासैनी र नेकपाका नेता टिका पराजुली, निर्माण व्यवसायी लगायत स्थानीय सरोकारवालाको बाक्लो उपस्थिति रहेको थियो ।
