१३ असार २०७६, काठमाडौं
सिंहदरबारको पूर्वी गेट अगाडि पार्किङमा राखिएको नेपाल सरकार गृह मन्त्रालयका सह–सचिव रामकृष्ण सुवेदीको गाडी कारवाही गर्ने ट्राफिक प्रहरीलाई सम्मान गरिएको छ ।
अनाधिकृतको रुपमा सिंहदरबारको पूर्वी गेट अगाडि पार्किङ गरेर गाडी राखिएको बा २ झ ४३८८ नम्बरको सरकारी गाडीमा ट्राफिक प्रहरी जवान टिकाराम बुढाले कारबाही गरे । जवान टिकाराम बुढाले गृहका प्रवक्ता समेत रहेका सुवेदीको गाडी लक गर्नुका साथै एक हजारको चिट समेत काटेका थिए ।
गृहकै सह सचिवको गाडीलाई कारबाही गरेपछि ट्राफिक प्रहरी जवान बुढालाई सडकमै युवाहरुले सम्मान गरेका हुन् । पद र शक्तिको भेद नगरी गल्ती गर्ने सबैलाई समान हिसावले कारबाही गरेको भन्दै उनलाई युवाहरुले सडकमै दोसल्ला ओढाएर सम्मान गरेका छन् ।
गृहका सहसचिव सुवेदी पार्किङ गर्न निषेध गरिएको स्थानमा गाडी रोकेर खाना खान गएका थिए । सोही समयमा प्रहरीले उनको गाडीमा लक गरेको थियो ।
ह्वील लक गरेपछि चर्को दबाबमा केही समयमै अनलक गरेका थिए । तर उनले एक हजार रुपैयाँको चिट भने काटेका थिए ।
ट्राफिक प्रहरीले गाडी लक गरेको थाहा पाएपछि आफ्ना चालकसहित गाडी भएको स्थानमा आएर ट्राफिकलाई ‘म गृह मन्त्रालयको प्रवक्ता हुँ’ भन्दै चिट नकाट्न आग्रह गरेको जवानले बताएका छन् । तर उनले गाडी लक गर्नुका साथै एक हजारको चिटसमेत काटेका थिए ।
