१३ जेष्ठ २०७६, काठमाडौं
स्थानीय सरकार गठन भएको करिब साढे दुई वर्ष बितिसकेको छ ।
स्थानीय सरकार गठन भएपछि सो तहले सबै क्षेत्रको अधिकार पाएको छ ।
कत्ति स्थानीय तह सो अधिकार प्रयोगको सवालमा विवादिद बनिरहेको छ ।
नेपालको ७५३ ओटा स्थानीय तहहरुमध्ये कत्तिले सजिलै आफ्नो काम कारबाही अगाडी बढाईरहेका छन् त कत्ति स्थानीय तहमा जनप्रतिनिधि नै विवादमा तानिएका छन् ।
यस्तै पछिल्लो समय शैक्षिक विवादमा तानिएको छ, थुलुङ दुधकोशी गाउँपालिका !
९ ओटा वडा रहेको सो गाउँपालिका अहिले शिक्षक सरुवाको विषयलाई लिएर विवादिद बनिरहेको छ ।
शिक्षक सरुवाको विषयमा गाउँपालिका उपाध्यक्ष सविता राई, १ नं वडाअध्यक्ष घनराज सुनुवार, ३ नं वडाअध्यक्ष भूपाल ध्वज राई, ४ नं वडाअध्यक्ष नातीकाजी गुरुङ र ६ नं वडाअध्यक्ष फुर्तिमान तामाङले विज्ञप्ती नै जारी गरि असन्तुष्टि जनाएका छन् ।
विज्ञप्ती हेर्नुहोस्–
गत २५ बैशाखमा गरिएको शिक्षक सरुवा विद्यालयको आवश्यक्ता, विषयगत दक्षता, विद्यार्थी तथा शिक्षकको सहुलियतलाई मध्यनजर नगरी शिक्षा ऐन र नियमावली विपरित भएको भन्दै उनीहरुले असन्तुष्टि जनाएका हुन् ।
गाउँपालिकामा विवाद देखिएको यो पहिलो पटक भने होईन, यसभन्दा पहिले पनि गाउँपालिकाको नामाकरणमा विवाद देखिएको थियो ।
यद्यपी, त्यस विवादपछि भने सबै जनप्रतिनिधिहरुबीच गाउँपालिकाको हरेक मुद्दामा साझेदारी नै हुँदै आएको थियो ।
तर, आगामी वर्षलाई शैक्षिक सुधारको वर्ष भनिरहँदा गाउँपालिका फेरि एकचोटी विवादित बनेको हो ।
सोही विषयमा हामीले यसको भित्रीसम्म पुगेर सोही गाउँपालिकाका अध्यक्ष, अन्य असन्तुष्ट जनप्रतिनिधि तथा गाउँपालिकामा अवस्थित केही विद्यालयहरुको प्रध्यानाध्यपक/शिक्षकहरुको विचारलाई समेटेर यो लेख तयार पारेका छौं ।
गाउँपालिका अध्यक्ष असिम राई
यो एकदमै मनासिव छ ।
स्थानीय तह पनि सरकार नै हो ।
स्थानीय सरकार प्रदेश र संघीय सरकारको डिभिजन हो । संविधानले दिएको अधिकार उपयोग गर्ने सवालमा मात्र यो विवादजस्तो देखिएको हो । वास्तवमा यो विवाद होईन ।
हामीले गरेको काम सतप्रतिशत संवैधानिक छ ।
बरु हाम्रो गाउँपालिकाले मिलेर काम गरिरहेको देखेर कुनै राजनीतिक दलले भाड्ने प्रयास मात्र गरेको हो ।
के भन्छन् त अन्य असन्तुष्ट जनप्रतिनिधिहरु?
गाउँपालिका उपाध्यक्ष सविता राई
शिक्षक सरुवाको यो कार्यले यत्तिबेला शैक्षिक वातावरण खलबलिएको छ ।
शैक्षिक सुधारको नाममा भएको यो कार्यदेखि हामी असन्तुष्ट छौं ।
यो विषयलाई लिएर करिब ७० प्रतिशत शिक्षकहरु पनि असन्तुष्ट छन् ।
मैले बिचमा अध्यक्ष ज्यूलाई फोन पनि गरें तर, त्यत्तिबेला त्यस्तो कुनै प्रतिक्रिया आएन ।
गाउँपालिकाको अरु कामहरु सहारनीय भएपनि यो भने, हामीलाई अपच छ ।
अझै हामी भन्दैछौं, यो विषय सचिनु आवश्यक छ ।
१ नं वडाअध्यक्ष घनराज सुनुवार
गाउँपालिका गठन भएपछि सबै कामहरु साझेदारीमै गर्दै आएका हामी यो बेला भने अलिक विवादमा तानिएका छौं ।
शिक्षक सरुवाको विषयमा हाम्रो विचारमा विभेद देखियो ।
कार्यदलले एकपक्षीय रुपमा निर्णय गर्यो ।
ठिक छ शिक्षक सरुवा गर्नुपर्छ सबैको विचारलाई बुझेर ।
तर, अहिलेको यो विषय पार्टीगत देखियो ।
४ नं वडा अध्यक्ष नातीकाजी गुरुङ
कार्यदलले एकपक्षीय ढंगले गर्यो ।
हामीलाई कुनै खालको सुझाव नमागिएपछि हामीलाई लाग्यो यो नाममात्रैको कार्यदल हो ।
यो निर्णय सच्याईएन भने हामी पनि यो भन्दा अगाडीको नियम कानूनमा जान वाध्य हुनेछौं ।
शैक्षिक सुधारको नाममा शैक्षिक कंलक भएको छ ।
कमसेकम जनप्रतिनिधि र कार्यदलको सदस्य भएको नाताले हामीलाई पनि केही सोध्नुपर्ने हो ।
हामीले गाउँपालिकाको सबै विकास निर्माणको कार्यमा एकरुपताका साथ काम फत्ते गर्दै आएका थियौं, तर यो विषयमा हामी असन्तुष्ट छौं, यो सचिनु आश्यक छ ।
३ नं वडाअध्यक्ष भूपाल ध्वज राई
यो निर्णयमा केही न केही हामीले विभेद देखेका छौं ।
शिक्षक सरुवाको नाममा आफ्नोपनलाई घुसाईएको छ ।
सरुवाको नाममा आफ्नोलाई राम्रो ठाउँमा अनि अरुलाई भने विकट ठाउँमा सरुवा गर्ने काम भएको छ ।
त्यसैले हामी असन्तुष्ट छौं । यसमा हाम्रो आपत्ति छ ।
६ नं वडाअध्यक्ष फुर्तिमान तामाङ
यो काम पुर्वाग्राही ढंगबाट भयो ।
त्यहाँ कुनै वडा शिक्षा समितिको राय सुझाव छैन ।
विद्यालय व्यवस्थापन समितिको कुनै सझाव मागिएको छैन ।
अरु त ठिकै नै छ, त्यहाँ त्यो सम्म भएको छ, श्रीमान श्रीमतीसमेतलाई छुट्याउने काम भएको छ ।
अवकाश हुनलाई दुई महिनामात्रै बाँकी हुने शिक्षकलाई समेत सरुवा गरिएको छ ।
त्यसैले हामी यो निर्णयसँग एकदमै असहमत छौं ।
गाउँपालिकास्थित केही विद्यालय तथा शिक्षकहरुको विचार
जनकल्याण उच्च माविका प्रधानाध्यपक जेबी राई–
यो विषयमा हामीले भन्ने भनेपनि गाउँपालिकाले हेर्ने कुरा हो ।
अब यसमा कत्ति शिक्षकहरुले आफ्नै खुशीले सरुवा पनि भएका छन् ।
यो निर्णयप्रति कत्ति खुशी नै छन् । त, कत्ति दुःखी पनि छन् ।
यसको प्रभाव अहिले नै चाहिँ परेको छैन ।
हिमालय माविका शिक्षक भेष कुमार राई–
विद्यालयमा त्यस्तो कुनै खालको प्रभाव परेको छैन ।
यसपालिको सरुवा प्रोसेसबाट एकजना अंग्रेजी दरबन्दीको शिक्षक थप्न सफल भएका छौं ।
समग्रमा भन्नुपर्दा हाम्रो विद्यालयको स्थिती अनि यहाँको शिक्षकहरुको स्थिती मनासीव छ ।
