१३ बैशाख २०७६, काठमाडौं
चीनले आयोजना गरेको बेल्ट एण्ड रोड (बीआरआई) को दोस्रो अन्तर्राष्ट्रिय शिखर सम्मेलन बेइजिङमा आजबाट सुरु भएको छ ।
बीआरआईको उद्घाटनमा नेपालकी राष्ट्रपति विद्यादेवी भण्डारी पनि सहभागी छिन् ।
चीनका राष्ट्रपति ‘सी’को पहलमा अगाडि बढेको बीआरआई परियोजनामा नेपालले दुई वर्षअघि हस्ताक्षर गरेको थियो ।
जसअन्तर्गत अहिले नेपालले कनेक्टिभिटि र जलविद्युत सहित ९ वटा परियोजनाहरू प्रस्ताव गरेको छ ।
“बीआरआईले कनेक्टिभिटि र व्यवहारिक सहकार्यलाई बढाउने छ, यो साझा विकास लक्ष्य हासिल गर्ने प्रयास हो ।” ‘सी’ले भने ।
१५० देश तथा संगठनले बीआरआई परियोजनामा चीनसँग हस्ताक्षर गरेको जनाउँदै ‘सी’ले भने, “पहिलो बीआरआई सम्मेलनको निर्णय सफलतापूर्वक लागू गरिएको छ ।”
गत वर्ष भएको पहिलो बीआरआई सम्मेलनमा पनि नेपाल सहभागी भएको थियो ।
तीन दिनसम्म चल्ने सम्मेलनमा ३७ देशबाट राष्ट्र तथा सरकार प्रमुख र उच्च नेताहरू सहभागी भएका छन् ।
