१० बैशाख २०७६, काठमाडौं
बंगलादेशले नेपाली धागो आयातमा लगाउँदै आएको प्रतिबन्ध फुकुवा गरेको छ ।
बंगलादेश सरकारले ४ वर्षदेखि लगाँउदै आएको प्रतिबन्ध नेपाली धागोको परीक्षणपछि फुकुवा गरेको हो ।
त्यहाँको राष्ट्रिय राजस्व बोर्डले स्थलमार्ग हुदैँ धागो आयात गर्न अनुमति दिने निर्णय गरेसँगै नेपालबाट बंगलादेशमा धागो निकासी गर्ने बाटो खुलेको हो ।
बंगलादेशले ४ वर्षअघि नेपाली धागोको आयात बन्द गर्ने निर्णय गरेको थियो ।
नेपाली पक्षले भने सन् २०१७ देखि नै प्रतिबन्धले नोक्सानी पुगेको भन्दै फुकुवा गर्न आग्रह गर्दै आएको थियो ।
नीजि तथा सरकारी तबरमा भएका विभिन्न छलफल र नेपाली धागोको गुणस्तर परीक्षणपछि बंगलादेश सरकार नेपाली धागोको आयात गर्ने निष्कर्षमा पुगेको हो ।
हाल नेपालमा दर्शनौं धागो उद्योग सञ्चालनमा छन् । धागो नियातको प्रमुख गन्तव्य बंगलादेशले प्रतिबन्ध लगाएपछि नेपाली उद्योगहरु प्रभावित हुँदै आएका थिए ।
बंगलादेश सरकारको धागो आयातमा लगाइएको प्रतिबन्ध फुकुवा गर्ने निर्णयसँगै नेपाली धागो व्यवसायीलाई राहत पुगेको छ ।
