१३ पुस २०७५, इटहरी
जलवायु सम्बन्धी ग्लोबल रिस्क इन्डेक्स २०१९ को तथ्याङ्क सार्वजनिक गर्दै गर्दा नेपाल जलवायु परिवर्तनबाट सबैभन्दा बढी जोखिममा रहेका राष्ट्रहरूको सूचीमा परेको छ । केही समय अगाडी जलवायुसम्बन्धी विश्व सम्मेलन चलिरहेको बेलामा यो तथ्याङक सार्वजनिक गरीएको हो । तथ्याङ्क अनुसार नेपाल जलवायु परिवर्तनको उच्च जोखिम पर्ने राष्ट्रमा चौथो स्थानमा परेको छ ।
यस्ता तथ्याङक सार्वजनिक भइरहँदा विराटनगरमा भने जलवायु परिवर्तन सम्बन्धी छैटौँ राष्ट्रिय युवा सम्मेलन सुरु भएको छ । बिहीबारबाट सुरु भएको जलवायुका लागी नेपाली युवाहरूको सञ्जालद्वारा आयोजित सम्मेलनमा सातै प्रदेशका ५८ जिल्लाका युवाहरूको सहभागिता रहेको छ ।
सम्मेलनमा जलवायु परिवर्तन सम्बन्धी विभिन्न १० वटा कार्यपत्र प्रस्तुत गर्ने कार्यक्रम रहेको छ । सम्मेलनमा स्वच्छ ऊर्जा नेपाल, दिगो विकास, वाइपैड नेपाल र ग्रिन हुड नेपाल लगायत संस्थाका प्रतिनिधिले कार्यपत्र प्रस्तुत गर्ने आयोजक संस्थाकी नेटवर्क कोअर्डिनेटर सञ्जु श्रेष्ठले जानकारी दिइन ।
उनले सम्मेलनमा अनुभवको आदानप्रदान गरिनुका साथै जलवायु परिवर्तनसँग जुध्न युवाहरूको क्षमता अभिबृद्धि गरिने बताइन । तीनदिने सम्मेलन १४ गते विराटनगर घोषणापत्र जारी गर्दे सकिनेछ । जारी भएको घोषणापत्र वातावरण मन्त्रालयका साथै विराटनगर महानगरपालिकालाई समेत बुझाइने कार्यक्रम रहेको जनाइएको छ ।
