२९ कार्तिक २०७५, काठमाडौं
वीरगञ्ज महानगरपालिका १६ इनर्वामा बुधबार विराट कुस्ती प्रतियोगिता शुरु भएको छ । दिपावली तथा छठ पर्वको अवसर पारेर कुस्ती प्रतियोगिताको आयोजना गरिएको हो । कुस्ती प्रतियोगिताको पर्सा १ बाट निर्वाचित प्रतिनिधि सभा सदस्य प्रदीप यादवले उद्घाटन गरे ।
प्रतियोगितामा नेपाल र भारतको विभिन्न स्थानबाट कुस्तीवाजहरु सहभागी भएको आयोजक समितिका अध्यक्ष मदनप्रसाद यादवले जानकारी दिए ।
भारतीय सेना र एसएसबीमा आवद्ध जवानहरु समेत प्रतियोगितामा सहभागी छन् । विशेषगरी नेपालमा हुने कुस्ती प्रतियोगितामा भारतको दिल्ली, पञ्जाव, हरियाणा, बनारस, गोरखपुरबाट पहलवानहरु आउने गरेका छन् । तराई मधेसका जिल्लामा निकै लोकप्रिय रहेको कुस्ती हेर्नका लागि हजारौं दर्शकहरु अखडामा पुग्ने गर्दछन् ।
प्रतियोगितामा चर्चित कुस्तीवाजहरु भुरा पहलवान, केशब बाबा, अछेलाल पहलवान, आसिम पहलवान, शम्सेर पहलवान, ब्रम्हदेव पहलवान, सतन, राजु पहलवान लगायतले भाग लिएको अयोजकले जनाएको छ । प्रतियोगिता बिहीबारसम्म चल्ने छ ।
