३१ साउन २०७५, काठमाडौं
अर्जेन्टिनाका २० वर्षीय गेब्रिएल हेरेडियाका आश्चर्यजनक कथा रहेको छ । उनको जन्मँदादेखि नै दुवै हात थिएनन् तर उनले जिन्दगीको यो बाधालाई पन्छाउँदै हेयरड्रेसर (हजाम) बन्ने पहल गरे । उनले आफ्नो कमजोरीलाई तागत बनाएर असम्भवलाई सम्भव बनाएका छन् ।
परिवार, साथी र विद्यालयले कहिले पनि भेदभाव नगरेको अनुभव सुनाउने गेब्रिएलले भने, ‘म आफैं पानी लिएर पिउन सक्छु । म बाइक र कार चलाउन पनि सक्छु । अनि मलाई १४ वर्षकै उमेरमा हजाम बन्न मेरी आमाले प्रेरित गर्नुभएको हो । उहाँ आफैं पनि हजाम हुनुहुन्छ ।’
गेब्रिएलले कपाल काट्ने काम सोखका रूमा गरेका थिए । पछि उनले बिस्तारै दाह्री, कपाल काट्ने सबै प्रविधि सिके अनि त्यसैलाई पेशा बनाउने फैसला लिए ।
केही समयपछि नै उनी परिवारको सहायतामा सैलून खोल्न सफल भए । उनी अहिले हजाम काममा रुचि भएका मानिसलाई सिकाउने पनि गर्छन् ।
