११ साउन २०७५, एजेन्सी
चीनको सिचुआन प्रान्तमा रहेको नेइजिङमा बस्ने एक दुई वर्षीया बालिकाका पिताले उनलाई चिहानमा गाड्न तयार पारिएको हृदयविदारक कथा अखबारको हेडलाइन तथा चिनियाँ सामाजिक सञ्जालमा भाइरल भएको थियो ।
थालास्सेमिया नामक प्राणघातक रोगबाट पीडित झाङ सिनेलाई उनका बुवाले दिनदिनै चिहानमा खेल्न र आराम गर्नका लागि ल्याउने गरेका छन् । उनलाई पितासँगै दिनदिनै चिहानमा राखिने गरिन्छ ।
मिडिया रिपोर्टअनुसार पिताले मृत्युको तयारी स्वरूप उनलाई यसो गरेका थिए । सामाजिक सञ्जालमा तस्वीर भाइरल भएपछि उक्त बच्चीका लागि जनताले आर्थिक सहयोग संकलन गरेका छन् ।
परिवारले झाङको उपचारका लागि करीब २० हजार ६०० डलर खर्च गरेपनि ठीक नभएको र उपचार खर्च उठाउन नसकेको बताईएको छ । बच्चीको मानसिक स्वास्थ्यमा क्षति पुर्याएको भन्दै जनताले बच्चीप्रति सहानुभूति देखाएपनि आमाबुवाको व्यवहारप्रति आलोचना गरेका छन् ।
थालास्सेमिया वंशाणुगत रूपमा सर्ने रगतसम्बन्धी रोग हो । जन्मअघि नै यसको पहिचान हुनसक्ने भएपनि चीनका गाउँलेहरूलाई यसको परीक्षणका बारेमा जानकारी छैन ।
