स्पेनिस क्लब रियल मड्रिडका स्टार क्रिस्टियानो रोनाल्डो विश्वको चौथो महंगो खेलाडी बन्दै मंगलबार राति इटालियन क्लब यूभेन्ट्समा अनुबन्धित भएका छन् ।
९ वर्ष रियल मड्रिडमा बिताएका रोनाल्डो १ सय १२ मिलियन यूरोमा चारवर्षका लागि यूभेन्ट्समा अनुबन्धित भएका हुन् । सन् २००९ मा म्यानचेस्टर यूनाइटेडबाट ८० मिलियन पाउन्डमा रियल भित्रिएका रोनाल्डोले क्लबका लागि सर्वाधिक ४ सय ५१ गोल गर्दै कीर्तिमान राखेका छन् ।
पछिल्ला पाँच सिजनमा रियल मड्रिडलाई उनले चार पटक च्याम्पियन्स लिगको उपाधि दिलाएका छन् । ३३ वर्षीय रोनाल्डोले सन् २००८, २०१३, २०१४, २०१६ तथा २०१७ मा गरी पाँच पटक बलोन डी ओर अवार्ड जितेका छन् ।
रियल मड्रिडका लागि सर्वाधिक गोल गर्ने खेलाडीसमेत रहेका उनले चार सय ५१ गोल गरेका छन ।रियल छाड्ने निश्चित भएपछि आफूले बिताएका वर्षको सम्झनामा एक भावुक पत्र लेखेका छन् । पत्रमा उनले क्लबसँग आबद्ध रहँदा बिताएका क्षणको स्मरण गर्दै सबैलाई धन्यवाद दिएका छन् ।
