निषेधाज्ञा खुकुलो हुनेबित्तिकै नयाँ श्रम स्वीकृति लिनेको भीड



काठमाडौं । उपत्यकामा निषेधाज्ञा खुकुलो हुनेबित्तिकै वैदेशिक रोजगार विभागअन्तर्गतको ताहचलस्थित श्रम कार्यालयमा नयाँ श्रम स्वीकृति लिनेको भीड बढेको छ ।

मन्त्रिपरिषद्को बैठकले नयाँ श्रम स्वीकृति दिने काम अघिल्लो साता खुलाउने निर्णय गरेको थियो । यद्यपि बिहीबारबाट उपत्यकामा जनजीवन खुुकुलो भएसँगै नयाँ श्रम स्वीकृति लिनेको भीड बढेको हो । भीड बढे पनि श्रम कार्यालयले सरकारले तोकेको स्वास्थ्य मापदण्ड पालन गरेर सेवा दिइरहेको जनाएको छ । वैदेशिक रोजगार विभागका महानिर्देशक कुमारप्रसाद दाहालले श्रम स्वीकृति दिने निर्णय गरेको दिनदेखि लागू भए पनि निषेधाज्ञा खुकुलो भएपछि सेवा लिनेको चाप बढेको जानकारी दिए ।

उनले भने, ‘नयाँ र पुरानो श्रम स्वीकृति दिने काम जारी तर महामारीको जोखिमका कारण भीड लगाएर काम गर्नु सबैका लागि जोखिम भएकाले समस्या परेकालाई प्राथमिकतामा राखेर काम भइरहेको छ ।’ वैदेशिक रोजगार विभागले नयाँ र पुरानो श्रम स्वीकृति दिने निर्णय गरेसँगै सम्बन्धित रोजगारदाता कम्पनीले नो अब्जेक्सन लेटर दिएकालाई मात्र श्रम स्वीकृति दिने सूचना भदौ १७ गते नै जारी गरेको छ ।

विभागको पछिल्लो निर्णयअनुसार पहिले श्रम स्वीकृति दिने नीतिसँंगै विभिन्न तीन मापदण्डलाई आधार मानेर नयाँ तथा पुरानो श्रम स्वीकृति दिने उल्लेख छ । जसअनुसार २०७६ फागुन २९ अघि मागपत्र प्रमाणीकरण भई पूर्वस्वीकृति लिएकाको हकमा सम्बन्धित श्रम गन्तव्य मुुलुकको रोजगारदाता कम्पनीले हालै जारी गरेको एनओसी सम्बन्धित दूतावासबाट प्रमाणित गराई अनिवार्य रूपमा पेस गर्नुपर्ने छ । उक्त समाचार आजको गोरखापत्रमा छापिएको छ ।

प्रतिक्रिया दिनुहोस्