यातायातमन्त्री नेम्वाङलाई यातायात मजदुरको ध्यानाकर्षण



३० चैत २०७६, काठमाडौं

लकडाउनमा मजदुरहरुलाई राहत दिने सरकारले निर्णय गरेको भएतापनि यातायात मजदुरहरु राहतबाट बन्चित भएपछि भौतिक पूर्वाधार तथा यातायात मन्त्री बसन्त नेम्वाङलाई नेपाल यातायात स्वतन्त्र मजदुर संगठनले आईतबार ध्यानाकर्षण गराएको छ ।

सिंहदरबारस्थित मन्त्रालयमा नेपाल ट्रेड युनियन महासंघ जिफन्टका अध्यक्ष बिनोद श्रेष्ठ र संगठनका अध्यक्ष भीमज्वाला राईले मन्त्री नेम्वाङलाई भेटी मजदुरहरुले राहत नपाएको विषयमा ध्यानाकर्षण गराउदै पाँच बुँदे ध्यानाकर्षण पत्र बुझाएका हुन् ।

लकडाउनका समय सरकारले दैनिक ज्यालादारी मजदुर, विपन्न र गरिवका लागि राहत वितरण गर्ने निर्णय गरेको भएपनि राहतका लागि तयार गरिएका अव्यवहारिक मापदण्ड र कतिपय स्थानीय जनप्रतिनिधिहरुको असहयोगका कारण अधिकांश यातायात श्रमिकहरुले सरकारको सहयोग प्राप्त गर्न नसकेको उल्लेख छ ।

चैत ११ गतेदेखि लकडाउन (बन्दाबन्दी) अझै लामो समय हुनसक्ने भएकाले दैनिक ज्याला(भत्ता) लिएर काम गर्ने देशका करिव साढे दश लाख यातायात मजदुरहरु (चालक, सहचालक, परिचालक, बुकिङ, लोडअनलोडर, कर्मचारी) ठूलो मारमा परेको र श्रमिकका परिवार विचल्ली परेको अध्यक्ष राईद्वारा हस्ताक्षरित पत्रमा उल्लेख छ ।

संगठनले अब उप्रान्त राहत फारमलाई सरलीकरण गरि सम्पूर्ण श्रमिकहरुले राहत पाउने ग्यारेन्टी गरिनुपर्ने, श्रम विभागमा दर्ता रहेको ट्रेड युनियन संघले सिफारिस गरेका श्रमिकहरुको विवरणको आधारमा स्थानीय सरकारबाट सहजै राहत पाउने व्यवस्था गरिनुपर्ने, सेवाका क्रममा देशका विभिन्न शहरहरुका रोकिएर रहेका श्रमिकहरुलाई आवास र खाद्यान्नको प्रवन्ध गरिनुपर्ने, ईन्धन बोक्ने ट्यांकर श्रमिकहरु, अत्यावश्यक सामग्रीहरु ढुवानी गर्ने सवारी साधनका श्रमिकहरुका लागि पिपिई (व्यत्तिगत सुरक्षा सामग्री) र प्रोत्साहन भत्ताको व्यवस्था गरिनुपर्ने, सरकारले परिभाषित गरेको अत्यावश्यक सेवा क्षेत्रमा काम गर्ने अन्यलाई झै यातायात श्रमिकहरुलाई पनि सेवा सुविधा उपलव्ध गराईनुपर्ने बारेमा मन्त्रीको ध्यानाकर्षण गराएको हो ।

ध्यानाकर्षण पत्र बुझ्दै मन्त्री नेम्वाङले आफूले प्रस्तुत विषयहरु सरकारको उच्च स्तरीय समितिमा छलफल गरेर निष्कर्षमा पुग्ने बताउँदै संगठनले तत्कालका लागि स्थानीय तहहरुसँग छलफल गरेर समस्याको समाधानका लागि पहल गर्न सुझाए ।

नेपाल यातायात स्वतन्त्र मजदुर संगठनको ध्यानाकर्षण पत्र : 

प्रतिक्रिया दिनुहोस्