१४ जेठ २०७५, काठमाडौँ
उपत्यकामा क्षमताभन्दा धेरै यात्रु बोक्ने माइक्रोबस र तीनपाङ्ग्रे सवारी साधनको जरिवाना रकम बढाइएको छ ।
गृहमन्त्रालयले गत जेठ ४ गते दुर्घटना न्यूनीकरण र ट्राफिक नियमको पालना कडाइका साथ लाग्न महानगरीय ट्राफिक प्रहरी महाशाखालाई निर्देशन दिएको थियो । यात्रु बोकेका सवारी साधनलाई ट्राफिक प्रहरीले ५०० रुपैयाँ जरिवाना गर्दै आएकामा जेठ १२ गते शनिबारदेखि एक हजार जरिवाना गर्न थालेको छ ।
जेठ ४ गतेदेखि हालसम्म महाशाखाले उपत्यकामा यात्रु उभ्याएर बोक्ने १८ सिटभन्दा कम क्षमताका ५० भन्दा बढी मार्गका १५५ माइक्रोबस र ४९४ टेम्पोलाई कारवाही गरेको जानकारी महाशाखाका प्रमुख एवं प्रहरी वरिष्ठ उपरीक्षक वसन्त पन्तले दिएका छन् ।
