१२ चैत्र २०७५, काठमाडौं
नेपाली पुरुष राष्ट्रिय फुटबल टोली कुवेतविरुद्ध भएको दोस्रो मैत्रीपूर्ण खेलमा १–० ले पराजित भएको छ ।
खेलको २९ औं मिनेटमा कुवेतले निर्णायक गोल गर्दै नेपालविरुद्ध बलियो सावित भएको हो ।
खेलदौरान कुवेतले अधिकांश समय आक्रमण गरेपनि गोलरक्षक किरण चेम्जोङ लगातार बाधक बनिरहे ।
पहिलो खेलमा गोलरहित बराबरी नतिजा हात पार्दा उत्कृष्ट रहेका किरणले दोस्रो खेलमा पनि आफ्नो लय कायम राखे ।
प्रशिक्षक योहान कालीनले पहिलो खेलबाट अग्रपंक्तिमा दुई खेलाडी परिवर्तन गरेपनि आक्रमणमा नेपाल फितलो देखिएको थियो ।
यससँगै कुवेत टुरमा नेपालले २ खेलमा १ बराबरी र १ हार बेहोरेको छ ।
प्रशिक्षक योहान कालीनको पहिलो जिम्मेवारीमा नेपाली टोलीको प्रदर्शन सन्तोषजनक रह्यो ।
पहिलो रोजाइका अधिकांश खेलाडी उपलब्ध नभएको अवस्थामा कालीनले नयाँ खेलाडीलाई मौका दिएका थिए ।
