पुरुषको दाँजोमा महिलाको मस्तिष्क तीन वर्ष यूवा हुने वैज्ञानिकहरुको दावी

२८ माघ २०७५, काठमाडौं

वैज्ञानिकको दावीअनुसार महिलाको मस्तिष्क उनीहरूको उमेरकै पुरुषको दाँजोमा तीन वर्ष युवा हुन्छ ।

यसैकारण महिलाको मस्तिष्क लामो समयसम्म तीव्र गतिले चल्ने गरेको हो । यो अध्ययन ‘प्रोसेडिङस अफ नेसनल एकेडमी अफ साइन्सेज’ मा प्रकाशित छ । उक्त अध्ययनमा २० देखि ८४ वर्षका १ सय २१ महिला र ८४ पुरुष सहभागी थिए । अध्ययनअन्तर्गत उनीहरूको मस्तिष्कमा ग्लुकोज र अक्सिजनको प्रवाह नाप्न उनीहरूको ‘पीईटी स्क्यान’ गरिएको थियो ।

मस्तिष्कको मेटाबोलिज्मसम्बन्धी क्रियाले महिला र पुरुषको उमेर बढ्दा उनीहरूको मस्तिष्कको अन्तर बुझ्न सघाउन सक्छ । मस्तिष्क ग्लुकोजले चल्छ तर मस्तिष्कले ग्लुकोजको उपयोग कसरी गर्छ भन्ने कुरा उमेर वृद्धिसँगै परिवर्तन हुँदै जान्छ ।

अध्ययनमा संलग्नहरूको उमेर र मस्तिष्कको क्रियाबीच सम्बन्ध पत्ता लगाउन एउटा मेसिनमा पुरुषको उमेर र मस्तिष्क क्रियाको तथ्यांक हालियो । अनुसन्धानकर्ताहरूले महिलाको मस्तिष्कको मेटाबोलिज्मको तथ्यांकलाई पनि मेसिनमा हाले र तथ्यांकले महिलाको मस्तिष्कको उमेरको गणना गरे ।

महिलाको वास्तविक उमेरभन्दा उनीहरूको मस्तिष्कको आयु ३।८ वर्ष युवा देखियो । अर्कातिर, पुरुषको मस्तिष्कको आयु वास्तविक उमेरको दाँजोमा २।४ वर्ष बढी थियो ।