पर्यटकलाई लक्षित गरि कोसेली घर स्थापना



२७ असोज २०७५, घोराही

जिल्लामा उत्पादित घरेलु सामग्रीलाई प्रवर्द्धन तथा प्रोत्साहन गरी घरेलु उद्योगबाट उत्पादित वस्तुलाई बजारीकरण गर्ने उद्देश्यले जिल्ला उद्योग वाणिज्य सङ्घले यहाँ कोसेली घरको स्थापना गरेको छ ।

कोसेली घरको आज एक कार्यक्रमकाबीच प्रतिनिधिसभा सदस्य रेखा शर्माले उद्घाटन गर्दै स्थानीय उत्पादनलाई व्यावसायीकरण र बजारीकरण गर्नको लागि उद्योग वाणिज्य सङ्घले नयाँ कामको थालनी गरेको भन्दै प्रसंसा गरेका थिए ।

सीप भएर पनि आर्थिक अभावका कारण आफ्नो सामग्रीलाई बजारसम्म पुर्याउन नसकेका महिलाका सामग्रीलाई बढी स्थान दिनुपर्ने उनको भनाइ थियो ।

लामो समयदेखि कोसेली घरको स्थापना गर्ने प्रयास थालेको सङ्घले अहिले आएर आफ्नो योजना सफल भएको जनाएको छ । सङ्घका अध्यक्ष नारायण भुसालका अनुसार कोसेली घरमा स्थानीय महिलाले उत्पादन गरेका अल्लोका सामग्री, सुकाको सिन्की, मासुको सुकुटी, च्याउको सुकुटी, मह, तेल, अचार, काठका मूर्ति, लोप हुँदै गएका तिल्की चामल, सिम्ठारो चामल, कोदो, फापर र मकैका पिठो, बेसार, खुकुरी, चुलेसी, मुक्त कमलरीले बनाएका ढकिया, जिल्लामै उत्पादन भएका पेय पदार्थ आदि बिक्रीका लागि राखिएको छ ।

विशेष गरी जिल्ला बाहिरबाट दाङमा घुम्न आउने पर्यटकलाई फर्किदा यहाँको चिनोस्वरुप लैजाने सामग्रीलाई एकीकृत गरिएको सङ्घका अध्यक्ष भुषालले बताएका छन् ।

प्रतिक्रिया दिनुहोस्