०१ असोज २०७५, काठमाडौं
छोरीको न्यायका लागि काठमाडौँ आएका निर्मलाका बुबा यज्ञराज र आमा दुर्गादेवीले सोमबार बिहान बालुवाटारमा प्रधानमन्त्री केपी शर्मा ओलीलाई भेटेका छन् ।
बलात्कारपछि हत्या भएकी १३ वर्षकी बालिका निर्मला पन्तका हत्यारालाई कुनै पनि हालतमा नछोड्ने प्रतिबद्धताा प्रधानमन्त्री ओलीले जनाएका छन् ।
करिव एक घण्टा भएको कुराकानीमा प्रधानमन्त्री ओलीले परिवारका सदस्यले राखेका कुरा निक्कै चासोपूर्वक सुनेका थिए । निर्मलाका बुवाआमाले भेटमा छोरीको न्यायका लागि प्रधानमन्त्रीको ध्यानाकर्षण गराएका छन् ।
बुवाआमाको कुरा पछि निक्कै भावुक देखिएका प्रधानमन्त्री ओलीले निर्मलाको न्याय र दोषीलाई कारवाहीका लागि आफू प्रतिबद्ध रहेको बताएका छन् ।
दोषी पत्ता लगाउन प्रहरी निलम्बनदेखि अनुसन्धानका लागि नयाँ टोली गठन गरिएको भन्दै प्रधानमन्त्री ओलीले निर्मलाका बुवाआमालाई ‘तपाईँहरुको पीडा मेरो पीडा हो’ भनि बताए ।
उक्त भेटमा खानेपानी मन्त्री विना मगर, नेकपाका नेता भिम रावल, कञ्चनपुरबाट आएका महिला अधिकारकर्मी तथा नेताहरुे लगायतको उपस्थिती रहेको थियो ।
